اسئله انتر فيو للمهندس المدني حديث التخرج - اسئله من تجارب شخصيه وخبرات - يجب ان تلم بها - لا تمر عليها مر الكرام

بسم الله الرحمن الرحيم

السلام عليكم ورحمة الله وبركاته 


- اسئله انتر فيو للمهندس المدني حديث التخرج -

- اسئله من تجارب شخصيه وخبرات - يجب ان تلم بها - لا تمر عليها مر الكرام -




مدير الشركة يريد التاكد بان حديث التخرج هل يفقة شيئا فى التنفيذ ام لا لذلك يختبرة بمعلومات هندسية وتنفيذية لكى يتاكد بانه مناسب للعمل معه ام لا .. اما المهندس صاحب خبرة 8 سنوات فاكثر لايحتاج المدير بان يساله اسئلة عملية لانه خبرة .. فيساله اسئلة مثل لماذا تريد العمل فى هذة الشركة ؟ كيف ترى نفسك بعد 10 سنين اخرى ؟ وهكذا
فهذة الاسئلة ليست مناسبة لحديث التخرج
لذلك اضع بين ايديكم الاسئلة التى سوف تواجه كل مهندس مدنى حديث التخرج للعمل فى مواقع التنفيذ وماخوذة من تجارب المهندسين ومن تجارب شخصية


بسم الله نبدأ



1- عندك قاعدة خرسانية 2*3 م ............ بالنسبة للحديد الفرش هيبقى فى اى اتجاه ؟ وليه ؟


بالنسبه للفرش والغطا فى القواعد فده ليه حالات:

- اولا لو كان العمود فى المنتصف والطرطفه متساويه ,,,,,مش هيفرق الفرش والغطا فى اى اتجاه ولكن يفضل فى الاتجاه القصير

- اما لو الطرطفه من وش العمود مش متساويه بيكون الفرش فى اتجاه اطول طرطفه

- اما بالنسبه بقا لاهم حاله وهى عمود الجار بيكون دايما الفرش فى اتجاه الجار سواء طويل او قصير وده مزكور فى كود الاساسات
ـــــــــــــــــــــــــــــــــــــــــــــــــــــــــــــــــــــــــــــــــــــــــ

2- اشرحلى اختبار الslump test ? وبنعمله ليه ؟

- اختبار ال slump ده بنستخدمه عشان نشوف قوام الخرسانه يعنى هل المياه بها كتيره ولا لاء وده بيتعمل عن طريق قمع

- وتعرف ان الخرسانه كويسه من الاختبار ازاى بقى لما تعمل الاختبار والخرسانه تنزل من القمع على شكل هرم دى افضل قوام للخرسانه
ــــــــــــــــــــــــــــــــــــــــــــــــــــــــــــــــــــــــــــــــــــــــــ

3- لما بنيجى نصب الخرسانة بناخد كام مكعبات الكسر عشان نعمل ليهم اختبار ؟ وكل كام متر مكعب ؟

 
- بناخد 6 مكعبات من الخرسانه اما بالنسبه للكميات او كل كام متر ده بيكون على مزاج الاستشارى براحته طبعا يعنى ممكن تلاقيه يتلككلك وياخد من قلبه خرسانه مش كويسه لو الصب بالنحله او ياخد من عربيه على مزاجه برده لو خرسانه جاهزه

- والمعمل الاختبار بيختبر 3 مكعبات من ال6 بعد 7 ايام و3 بعد 28 يوم ويشوف النتيجه ويطلع بيها تقرير ويعرض على الاستشارى
ــــــــــــــــــــــــــــــــــــــــــــــــــــــــــــــــــــــــــــــــــــــــــ

4- المترالمكعب الخرسانة درست فى الكلية انه يتكون من .8 م3 زلط و .4 م3 رمل؟؟ مع العلم ان مجموع النسب دى يعطى 1.2 م3 فما تفسيرك لذلك ؟؟

- المتر مكعب خرسانه عباره عن .8 زلط و4،رمل و7 شكاير اسمنت وطبعا دول بيعدو ال 1،2 طبعا ,,,,,,,,السبب الفراغات البينيه فبتالى الرمل والاسمنت هيملى الفراغات بين الزلط فلاذم النسبه هتزيد

ــــــــــــــــــــــــــــــــــــــــــــــــــــــــــــــــــــــــــــــــــــــــــ

5- فاصل صب الخرسانة المسلحة بيكون عند( الزيرو شير) ولا( الزيرو مومنت)؟؟ وليه ؟؟

 
- فاصل الصب بيكون دائما عند الزيرو مومنت وطبعا بيكون عند خمس البحر
ــــــــــــــــــــــــــــــــــــــــــــــــــــــــــــــــــــــــــــــــــــــــــ

6- بنوصل الحديد فى الكمرات عند ............... (الركائز ولا الوسط ) وليه ؟؟

 
- بنوصل الحديد دائما عند فصل العزم وبعباره تانيه مينفعش اوصل حديد فى وسط الباكيه عند ال ماكس مومنت
ويتم توقيف الحديد عند الركائز بحيث يعدى الركيزه ده فى السفلى اما العلوى لازم يعدى بربع البحر او 1 متر على الاقل
ــــــــــــــــــــــــــــــــــــــــــــــــــــــــــــــــــــــــــــــــــــــــــ

7- ازاى بتستلم الخنزيرة من النجار ؟؟؟؟؟

- استلام الخنزيره بيكون كلاتى استلم انها تكون متعامده واحقق معادله فيثاغورس واشوف افقيتها تماما وتبعد عن حدود المبنى مسافه متساويه واشوف تقويتها من الخوابير والواح الزنق العلوى والسفلى والمدادات
ــــــــــــــــــــــــــــــــــــــــــــــــــــــــــــــــــــــــــــــــــــــــــ

8- الحديد الاضافى العلوى فى البلاطة الفلات يسمى ف السوق ب ...............

 
- الحديد الاضافى العلوى فى الفلات سلاب بيسمى كابات او برانيط او برندات

ــــــــــــــــــــــــــــــــــــــــــــــــــــــــــــــــــــــــــــــــــــــــــ

9- لو الارض صخرة وانت عايز تحفر على عمق 3 متر .. فأى نوع من انواع عربية الحفار تستخدم لحفر الصخور ؟

 
- يتم حفر الأرض الصخرية بإستخدام البوكلينة
ــــــــــــــــــــــــــــــــــــــــــــــــــــــــــــــــــــــــــــــــــــــــــ

10- لماذا تستخدم الاحلال تحت الخرسانه العادية ؟


- باستخدم طبقة الاحلال عشان التربه عندى فيها مشاكل مينفعش اسس عليها واعرف ارمى خرسانه على سطح مناسب ومش هيهبط
ــــــــــــــــــــــــــــــــــــــــــــــــــــــــــــــــــــــــــــــــــــــــــ

11- ايه نوع الاسمنت المستخدم فى الاساسات ؟ والمستخدم فى السقف ؟ والمستخدم فى حوائط الخزان؟


- الاسمنت المستخدم فى الاساسات والخزنات اسمنت مقاوم للكبريتات والاملاح ويسمى سى وتر والمستخدم فى السقف اسمنت بورتلاندى عادى ,,,,,,وفى الاخر انت بتمشى تبع المواصفات اللى عندك
ــــــــــــــــــــــــــــــــــــــــــــــــــــــــــــــــــــــــــــــــــــــــــ

12 - لو وصلتلك تقرير بان مكعبات الكسر فشلت بعد 28 يوم اتعمل ايه ؟

- لو جت نتيجه اختبار المكعبات غير متوقعه اول حاجه ابلغ الاستشارى ,,,,,,,,,ونبدا نعمل اختبارات اولها
ultrasonic wave او نعمل اختبار الكور تيست وده متلف

- طيب لو حصل برده وتاكدنا ان الخرسانه مش مناسبه نعمل ايه؟؟؟؟؟؟؟؟ نعمل رى ديزين للمنشا على طووووووووول
ـــــــــــــــــــــــــــــــــــــــــــــــــــــــــــــــــــــــــــــــــــــــــ

13- ما اسم القطعه الخرسانية التى توضع فى ال cover فى الكمرات والسقف والاعمدة والاساسات ؟ وما سمك ال cover لكل منهم ؟ وليه بنستخدمها ؟

 
- اسم القطعه اللى بنحطها فى السقف والكمرات والاساسات والاعمده تسمى بسكوته وبنحطها عشان منخليش الحديد ظاهر يعنى لحمايتة من الصدأ ,,,,,,,,,وسمكها فى الاعمده والسقف والكمرات 2،5 سم وفى الاساسات 5 سم
ــــــــــــــــــــــــــــــــــــــــــــــــــــــــــــــــــــــــــــــــــــــــ

14- الوصلات فى الحديد تقول 65 مرة القطر فكم طول الوصلة لسيخ قطرة 22؟


- طول الوصله لقطر 22 فى الشد = 65*2،2=143 سم ,,,,,,,,وده اكبر من ال 1 متر
ـــــــــــــــــــــــــــــــــــــــــــــــــــــــــــــــــــــــــــــــــــــــ

15- وزن المتر الطولى للاسياخ معروفة فى جدول الحديد .. افرض انت مش معاك الجدول ومش حافظة ازاى تطلع وزن المتر الطولى لسيخ قطرة 16 من غير جدول ؟

- وزن المتر الطولى من حديد 16 ومن غير جدول = 16*16\ 162 = 1،58 كجم تقريبا
ـــــــــــــــــــــــــــــــــــــــــــــــــــــــــــــــــــــــــــــــــــــــ

16- الحداد لو سالك وعايزك تفصلة الكانه لكمرة طولها 30*70 يبقى طول السيخ للكانه الواحده كم متر ؟

- لو عندك كمره 30*70 وعاوز تعملها كانتها بالطول تساوى= 25*2 + 65*2 + 10 سم قفل كانه
ـــــــــــــــــــــــــــــــــــــــــــــــــــــــــــــــــــــــــــــــــــــــ

17- كثافة الحديد بساوى كم ؟ وكثافة الخرسانه العادية والمسلحة بيساوى كم ؟

- كثافه الخرسانه العاديه 2،2 والمسلحه 2،5 والحديد7،8 طن للمتر المكعب
ـــــــــــــــــــــــــــــــــــــــــــــــــــــــــــــــــــــــــــــــــــــــ

18- المتر مسطح مبانى فيه كم طوبة ؟ والمتر مكعب مبانى فى كم طوبة ؟

- المتر مسطح من الطوب مقاس 25*12،5*،6 = 56 طوبه تقريبا والمتر مكعب منه بيساوى 422 تقريبا
وال 1000 طوبه بياخد 3 شكاير اسمنت والمتر مكعب رمل بياخد 6 شكاير اسمنت بمعنى ان ال 1000 طوبه بياخد نص متر رمل و 3 شكاير اسمنت وبالنسبة للبلوكات مقاس 20*20*40 المتر المربع بياخد 13 بلوكة
ـــــــــــــــــــــــــــــــــــــــــــــــــــــــــــــــــــــــــــــــــــــــ

19- اذا كان عندى عمود طوله 30 سم وعرضة 60 سم وارتفاعه 3 متر ازاى اعرف وزن العمود ؟

- وزن العمود = حجمه فى كثافه الخرسانه المسلحه 2،5
ــــــــــــــــــــــــــــــــــــــــــــــــــــــــــــــــــــــــــــــــــــــ

20- ايه الفرق بين التيودوليت ؟ والتوتال استيشن ؟

- التديوليت باستخدمه لقيياس الزويا الافقيه والراسيه وللتوقيع وبستخمه كميزان اما التوتل فهو ادق واحدث بكثير فى التوقيع
ــــــــــــــــــــــــــــــــــــــــــــــــــــــــــــــــــــــــــــــــــــــ

21- كيف تستلم الاعمدة ؟ وكيف تستلم السقف ؟

 
- استلام الاعمده ده اول حاجه تروح للاعمده الطرفيه وتستلم حطاتها ومطابقتها للدور اللى تحت ولا لاء اوك بعد كده تفتح اللوح وتستلم اكسات الاعمده اللى فى النص عن طريق الحطات ومتنساش القص تخلى بالك من اماكنه حلو اوى ده

- بعد كده تسيب النجار يكمل شغله براحته وتخلى الحداد ينزل يخلص حديده وتستلم حديده كلاتى لازم تقسيط الحديد نفس تقسيط حديد الاشاير ومربوط بالسلك الرباط فى بعض تانى حاجه تقسيط حديد الكانات ولازم تتربط من كل اطرافها بسلك رباط وتخلى بالك من قفل الكانه

- وبكده خلى النجاره تتقفل وقول للنجار يخلص تقويته عشان تستلم منه وزنه العمود بطريقه الخيط الوزان وتستلم التقويات عن طريق القمط وتكون بين كل حطه تقويه والتانيه حوالى 40 سم او 50 ومتنساش لو العمود كبير يتعمله تقويات بحديد 6ملم

- وبالنسبه للعمده الجار عشان طبعا تقويتها بتكون صعبه فبتكون تقويتها بعروق مايه وتربطها بالاعمده المجاوره
اما السقف فكلامه كتير هنحاول نختصره

- اولا النجاره تقيس الشرب من تحت داخل الدور يعنى وتشوف ارتفاع اكبر بلاطه من وش الخرسانه ارضيه لحد باطن السقف من تحت وبعد كده تحط ميزان القامه على النجاره وتشوف سقوط كل بلاطه وتوزن السقف

- بعد كده بالنسبه للتقويات يكون بين كل عرق والتانى ميزدش عن 80 سم ده العرق الراسى ويكون ميتوصلش الا بعرق زيه وفى الوصله يكون فيه قمط وطرف الرباط بينهم تقريبا متر بعد كده تتاكد من وجود عراق وحمال ولو البلاطه سمكها 30 سم او ازود تزود الحمال

- وبالنسبه للبالكونات تتقوى بعرق اسكندرانى مايل اما الكمرات تتاكد من تعامدها يعنى متكنش فى الاول 25 سم وفى اى نقطه تانيه رقم تانى اما حديد السقف اهم حاجه تلتزم باللوح وبتوقيفات الحديد وبتكريبه فى السقف وده مهم جدا
ــــــــــــــــــــــــــــــــــــــــــــــــــــــــــــــــــــــــــــــــــــ
22- وفى نفس الوقت كان فيه حدادين مسلح جايين يعملوا مقابلة ... فالمسئول قال ادى الجمل وادى الجمال .... المهندس موجود والحداد موجود ..اختبر الحداد يا بشمهندس ؟؟؟؟؟؟؟؟؟؟؟

- يبقى المطلوب منك فى البند 22 تكون عارف شوية مصطلحات النجارة والحدادة ومصطلحات التنفيذ عشان تختبرهم وانواع الخشب وايه الفرق بين الالواح والعروق فى الخشب ووزن المتر الطولى للسيخ لكل قطر


لا خير في كاتم العلم

شارك الموضوع ليصل لغيرك


لا تنسونا من صالح الدعاء

م / معاذ السبع

لا تتردد في وضع استفسارك او اقتراحك لنا في التعليق او التبليغ عن رابط لا يعمل .
واتق الله في ما تكتبه . وكن علي يقين ان ما تكتبه يعبر عن شخصيتك .
تحويل كودإخفاء محول الأكواد الإبتساماتإخفاء

شكرا لك ولمرورك

برامج هندسيه

جديد البرامج الهندسيه
حلول بلوجر

احدث المقالات